Burime zyrtare nga Lëvizja Socialiste për Integrim thanë për GSH.al se 2 kandidatët e kësaj partie për postin e presidentit janë Ilir Meta dhe Petrit Vasili. Formalisht, ky ka qenë propozim i Luan Ramës në mbledhjen e grupit parlamentar të LSI.
Krerët e koalicionit, Rama-Meta bashkë me mbështetësit e tyre kryesorë në partitë respektive janë mbledhur tek Vila 30 në zonën e ish-Bllokut në Tiranë për të diskutuar rreth procesit të nesërm të zgjedhjes së kreut të shtetit. Burime mediatike thanë se Ilir Meta do të jetë presidenti i ardhshëm dhe për këtë ka nisur edhe mbledhja e votave.
Muajt e fundit kanë shënuar përplasje konstante mes dy partive, disa ministra dhe shumë deputetë të LSI-së kanë kërkuar që Ilir Meta të synojë postin e kryeministrit të vendit.
Vetë Meta ka deklaruar se këtë gjë do ta vendosin shqiptarët, duke nënkuptuar se ai synon të qëndrojë si kryetari i LSI-së të paktën në fushatën për zgjedhjet e ardhshme parlamentare.
Ndërkohë, nëse Ilir Meta do të zgjidhet president i Republikës ai do dorëhiqet nga kreu i LSI-së, duke ja lënë vendin Luan Ramës ose Petrit Vasilit. Burime pranë LSI-së thanë për GSH.al “drejt këtij skenari po shkohet”…
“Meta president” do të përkthehej jo thjesht automatikisht në “Rama kryeministër” edhe 4 vite të tjera, por do të sanksiononte pushtetin e plotë dhe kontrollin e Partisë Socialiste mbi Kuvendin e ardhshëm, institucionet e drejtësisë, pushtetin vendor dhe jetën e vendit në përgjithësi.
GSH.al
